(1904) Al par de la saltadera

link

Oh, Manín; dicen per hí
que te cases, ¿ye verdá?
con Ramona del Ferreru
de Bernaldu de Colás,
y que dexes á Pepina
del Regatu de Fabar,
con quian tabes en amores
fai tres años, algo más,
en viniendo les cereces
colorades de San Xuan.
Que Ramona tien más dote;
que ye más humanidá;
qu'en sos manes la fesoria
mete miedu lo que fai;
que si torna, que si güelve,
patatín que patatán...
Home, calle; non pedriques
nin me fagas renegar,
que si dexes á Pepina,
non mereces caridá.
Lo que tienes ye codicia
que por mal camín te trai,
sin cuidar que nesti mundu
ye un soplíu y non ye más,
esta vida que nos cuesta
muncho más de lo que val.
Has pensar qu'el día'l Xuiciu
todo tien que arder, galán,
los palacios, les cabañes,
los xardines, el payar...
Yo non digo que Ramona
non ye fema muy capaz
de facer dichosu al home
con quian tenga que casar,
porque fega, non ye fega,
nin lo foi, nin lo será.
Ya sé yo que tien á gala
que se sepia nel llugar
que na estaya delgún otra
nunca la dexó detrás.
Pero, ¡cóngrio! pa Pepina
del Regatu de Fabar
non hay pelos, que ye guapa,
pero guapa de verdá.
Son lluceros sos güeyinos,
su boquina ye un rosal,
el color de la cereza
non se puede comparar
col que tiñe sos papinos
si se encienden nun brasal...
Y valiendo más pesetes
que de arenes tien la mar
esa neña, que la xente
non acierta lo que val,
el dexar á la probina
que non valga ya pa más,
ye pecau que non se quita
nin con dir á confesar:
pos, Manín ¡ye muncho cierto
que la paga quian la fai!
¡Qué ye qué! ¿Que non te cases,
porque agora non te da,
con Ramona del Ferreru
de Bernaldu de Colás
nin tampoco con Pepina
del Regatu de Fabar,
por aquello del güe sueltu
bien se llambe?... ¡Recaray!
¿Non se llamben miyor dos,
so pegazu de animal?
Non gorgutes, que barrunto,
lo que pienses alegar:
"si tan sueltos, que ye asina;
más si tan xoncidos, cá."
Pero ven acá, so pértigu,
so borricu, so pelgar,
¡eso reza con les vaques,
con los gües y nada más!
porqu'el xugu del casoriu
ye de goma pa estirar.
Lo miyor ye que te cases
con Pepina, ya que tal
rapacina ye la probe
la más guapa del llugar;
y non pienses en Ramona
del Ferreru de Colás,
que la tengo n'entredichu
pa llevala yo al altar...
¡Pos casando yo con ella
quedarámos l'alma en paz!